كرافته

رواية "كرافته" سلطت الضوء وتمحورت حول نوع من التحقيقات غير موجود في مصر تقريباً والأسباب معروفة.. وهو التحقيق الصحفي.. الذي أراه من أمتع التحقيقات من وجهة نظري.. قرأت الرواية بعد مشاهدة فيلم "سبوتلايت: بُقعة الضوء" فكنت أشعر أنني ما زلت داخل جو التحقيقات الصحفية.

التحقيقات الصحفية عُبارة عن أنه تحدث جريمة قتل ما.. ويبدأ فريق عمل مُجهز لتلك الأمور بالبحث بمساعدة الشرطة عن القاتل.. وغالباً ما يكون القاتل مراوغ.. ولكن القاتل هنا فاجئني حقاً.

الرواية مبذول فيها جهد لذكر تفاصيل التحقيقات الجنائية والطبية بأدق التفاصيل المُمكنة.

الصراعات النفسية للشخصيات في الرواية أعجبتني جداً وخصوصاً لـ "مالك" و "يارا" و "هاني" و "عايدة".. شعرت بصراعتهم النفسية وكأني أمامهم يقصون علي له ما بداخلهم.

الرواية سلطت الضوء على فساد الطبقة العليا وما يُمكن أن يفعله الشخص من أجل بعض المال ليزيد رصيده البنكي.

نوع الرواية هو رواية بوليسية.. فلو أنت مُحب للأدب البوليسي -مثلي- ستجدها ممتعة جداً وستتشوق لمعرفة القاتل وستتفاجئ عندما تعرفه.

الكاتب ضبط كل ظروف القاتل وأسباب إنتقامه.. شعرت بأني أمام قاتل محترف مُتمكن من كل شيء حتى عندما تم كشفه كان مُخطط لذلك مُسبقاً وله هدف أيضاً!

فى النهاية رواية محترمة وبداية واعدة لكاتب شاب.. في انتظار القادم وإن شاء الله يكون أقوى.

بتبدأ احداث الرواية بالتعرف علي شخصيتين رجال اعمال وهم عزت و سلمان، ازاي بدأت علاقة صداقتهم و تطورت للشراكة بينهم في شركة واحد و بيسنس واحد، ياخدنا الكاتب فلاش باك شوية و حاضر شوية لحد ما نعرف مين دول و كمان علاقتهم بزوجاتهم و حياتهم الزوجية عامتا، بعد كدا بنشهد عن جريمة قت.ل إحدي السيدات بطريقة بشعة ذبح و إغت.صاب و خنق بوساطة ((كرافتة))..

ف يا تري، مين القاتل، وليه اختار لكرافتة سلاح، و ازاي المحقيقين هيعرفوا يوصلولوه، كل دا هنشوفه بواسطة المحقق احمد و الرائد محمد جمعة و طبعا لا نهمل الجانب الصحفي من القضية، الصحفي الشاطر مالك الي بيحاول جاهدا بجانب الشرطة فك لوغاريتم الجريمة.. الي طبعا مش هتبقي الوحيدة🤨

((تصلح الرواية لمن هم فوق الـ١٨ سنة لوجود مشاهد جن.سية و دم.وية))

رواية كرافتة هي طبعا كما واضح في النبذة هي عمل جريمة تحت نوعية (من فعلها) و انا شخصيا بحب النوعية دي من الرويات، فهل العمل دا كان موفق بالنسبة لي؟!

في البداية السرد كان لغة عربية فصحي متوسطة، ودا مقبول لان الروايات البوليسية الكاتب فيها مش بيركز اوي علي حتة اللغة قد ما بيركز ازاي يعقد اللغز و يحير القارئ، و طبعا مش معني كلامي ان الي بيكتب رواية جريمة انه عادي يكتب بلغة ركيكة لا تصلح انها تبقي كتاب اصلا، لا بقول لغة متوسطة.. معقولة👌

الحوار كان بالعامية المصرية و مكنش عندي مشكلة معاه كلغة.. ولكن عندي مشكلة معاه تاني هذكرها كمان شوية..

الوصف، عجبني.. في الاول وبعد كدا بقاا، ولا اقولك هتكلم عليه تحت برده 😅😅

تصميم الشخصيات.. كان موفق جدا في العمل دا، في دوافع ظاهرة و مبررات للي بيحصل، بناء تاريخي كويس.. جداااا بالذات مع شخصية القا.تل

(الدافع) اهم شيء لازم يظهر في اعمال الجريمة وهو دافع القا.تل او بالمعني الادق ما وصله لهذه المرحلة من فعل قاسي زي ((القت.ل))

كل دا الكاتب نجح فيه.. هو ممكن يكون غير منطقي لبعض القراء ولكني بالنسبة لي عادي، عدت

الكاتب نجح في خداعي كقارئ، مش هقول بقا اني عرفت القا.تل من اول كام صفحة و كدا لا، انا اتخدعت و الحبكة عجبتني كمان.

اما بالنسبة لخلق جو تشويق و غموض و دا طبيعي يبقي عالي في رواية تصنيفها جريمة.. إلا ان للاسف يا عزيزي المشاهد النارية فعلا مظهرتش غير بعد ٦٠٪ من العمل تقريبا، و هنا ندخل في السلبيات.

الكاتب خد وقت كتير اووووي في الخطوط الاجتماعية علي حساب الخطوط الي كان المفروض يبقي فيها جو اثارة اكتر من كدا، انا فاهم كويس جداا ان الجانب الاجتماعي و النفسي للشخصيات بيكون مهم في روايات الجريمة و واجب إظهاره بشكل جيد ولكن ليس علي حساب فصول التشويق و الشيء الأساسي اصلا في العمل وهو الجريمة

صعب لما ييقي عمل تصنيفه الاول جريمة و المشهد الناري يحصل بعد ٣٠ او ٤٠ في المئة من العمل بل و نستني لحد ٦٠٪ عشان الاحداث تبدأ تشدك بقا و تدخل في دائرة الشك و التحقيقات و هكذا..

نقطة الحوار و الوصف بقا و المشكلة فيهم

الحوار كتيير اووي صفحات ورا بعض حوار فقط و دا بيأثر علي هيكل الرواية، فاهم ان الاعمال البولسية محتاجة حوار كتير عشان شغل تحقيقات و كدا بس برده بموهبتك توصلي بدون غزارة حوار او تشيل الحاجات الي ملهاش لازمة

يعني مش شرط

- الو ازيك

- انا الحمدلله. و انتي

- بخير الحمدلله

لا كدا بصراحة مشكلة تعيب العمل.

الوصف بقا كان في بعض الاحيان فيه إسهاب هو عجبني ف الاول و انا بشوف ان الوصف جانب مهم اووي في العمل لكن في شعره بسيطة بين العدم خالص و الإسهاب و كتير من الكُتاب مش بيعرفوا يخلوا بالهم من الشعره دي 😓

الخلاصة عمل حلو.. لو عايز تقرأ عمل كدا سريع خفيف بحبكة حلوة و هتعجبك و بنسبة عالية هتفضل مخدوع للاخر ارشحلك الرواية بغض النظر عن العيوب المذكورة برده هتسمتع ببعض الجوانب ♥️