لأ.. بطعم الفلامنكو

إنك تقرا كتاب فتلاقي فيه نفسك شيء متوقع وبيحصل أحيانا لكن في الكتاب ده هتلاقي اهلك وصحابك وزمايلك في الشغل وحاجة في منتهي ايه اللي بيحصل ده كل دول مرضى نفسيين

لو أنت أول مرة تقرأ لدكتور محمد فممكن تبدأ بالكتاب ده لان فيه كولكشن كدا من الكتب اللي فاتت فمش هتحس انك فاتك حاجة

الكتاب بالعامية المصرية بطريقه ساخره، استفدت جدا الحقيقه وفي اجزاء من الكتاب كانت ملهمة وبتجاوب عن أسئلة عدت عليا كتير مش كنت بلاقي ليها اجابة

اشكركم على إضافة هذا الكتاب بحثت عنه ووفرتوه فشكرا لكم

وفيك إنطوى العالم الأكبر ❤️

من أكتر الفصول اللي حبتها في الكتاب لمستها وحسيت فيها رسائل موجهة ليا .. تطور الوعي والطريق إلى النفس من أكتر الحاجات اللي لمستها الفترة اللي فاتت بمواقف وأزمات حياتية .. حقيقي د محمد حضرتك عبقري والفصل ده لوحده لازم يكون كتاب

كتاب رائع وبالتأكيد سأعود إليه مرة أخرى قريبا♥️

لما عرفت ان الكتاب قد يقع تحت تصنيف مساعدة الذات او الـSelf Help دخلت وانا متهوهوشة وحاسة اني عند اول كلام عليوي من بتاع التنمية البشرية هرمي الكتاب من الشباك وعوضي علي الله في الفلوس الي دفعتها لأن لا سني ولا مرارتي يسمحوا بذلك، لكن الحق يقال الكتاب غير كده تماماً

الحقيقة في رأيي المتواضع الكتاب اقل ما يقال عليه ان بيكشف العاهات والتقاليد والبلاوي النفسية الي كلنا بناعني منها، في اول جزء من الكتاب انا كسارة اتكدرت لأن الكتاب كل شوية يناولني في وشي بالوكامية من كمية المرار الطافح الي في شخصيتي الي حطني قدامه ولقيت لسان حالي بيقول "خلاص اختصر قولي اني شمبانزي واخلص" علي رأي محمد صبحي في مسرحية وجة نظر.. من اول عيوب قاتلة في شخصية الي العاب نفسية بنلعبها مع نفسنا ومع اقرب الناس لينا..

انا قلت مبدهاش بقي لو الضاكتور الفاضل بلاني بنعمة معرفة عاهاتي وسابني ومشي من غير ما يدينا حل كان وزع امواس نقطع بيها شرايينا مع الكتاب، لكن الحمد لله معملش كده هو كمان موزعش حل ده عمل الي انقح من كده..

الجزء الاخراني من الكتاب كلها عبارة عن تدريبات بتشجعك علي انك انت الي تلاقي حل لمشاكلك بنفسك لا وايه وكمان متعملش كده لوحدك بطريقة في منتهي الصياعة الضاكتور الفاضل خد بأيدي واداني امثلة ووراني اني مش لوحدي الي في القاع ده في معايا ناس كتير مما شجعني بشدة اني اكتب انا كمان واتصدمت في افكاري من كمية الدرر والهراء الي كانوا محشورين في زوري..

اما صحيح التعاسة تحب الرفقاء..

حقيقي انا بشجع الكل يقراه بس بنوه انك مينفعش تاخده طاخ ان كده، اقراه بتاني ادي لنفسك فرصة انك تفهم وتحس وتكتب وتشتغل معاه هتلاقي بلاوي بتنزل عليك وبتقول في هلع معقولة انا بعمل كده..

الكتاب كمان طلعت منه بكم لا بأس بيه من المفاهيم النفسية الي انا ناوية بمنتهي الجدية اقرا عنها أكتر لأني حاساها ليها علاقة بي جدا وبالفعل عملت كده وجالي هلع من كمية المعلومات المفيدة، لذلك بشجع الكل ان الحاجات والنظريات النفسية الي مكتوبة وانت تحسها شبهك وقريبة ليك خد بيها نوت لأنك هتحب تقرا عنها اكتر..

كتاب من كتر جموديته خلاني بقلب جامد انزل وبمنتهي الاريحية اشتري الكتابين التانين للضاكتور واقراهم واضحي بقي بالنص الباقي من مخي بعد ما النص الاولاني ضرب..

لذلك سو_ريفيو لكتاب #لأ_بطعم_الفلامنكو 5\5

• اسم الكتاب: لأ.. بطعم الفلامنكو

• الكاتب: د. محمد طه

• عدد الصفحات: ٣١٦

• دار النشر: الرواق للنشر والتوزيع

يعتبر الكتاب من فئة الكتب التي يجب أن نرجع إليها من حين لآخر؛ لأنه يسلط الضوء بفصوله المختلفة على النفس البشرية وبعض الحالات النفسية التي تستولى عليها سمة سلبية ما يجعلها الدافع في التصرفات الحياتية والسيد في اتخاذ القرارات المصيرية مثل العصبية والجبن والكسل، والحيل النفسية التي قد يلجأ إليها البعض في التعامل مع الآخرين، وما هي إلا تعبير عن شعور بألم عميق نتج عن خيبات متكررة أو إهمال من البيئة المحيطة عند الطفولة فما كانت إلا وسيلة دفاع عن النفس لجأ إليها المخ كمحاولة للنجاة.

كان للكاتب نظرة أكثر شمولية وعمقًا لبعض الآيات القرآنية، والتي استشهد بها؛ محاولة في تقريب بعض الأمور الشائعة فيما يخص النفس البشرية ليمحي أي قصور في الفهم المجرد لهذه الآيات وليؤكد على صحة ما كتب.

تعتبر اللغة العامية وهي اللغة التي فضل الكاتب استخدامها عامل جذب للكثيرين مما جعل الكتاب يخرج عن نمطية كتب علم النفس والتنمية الذاتية لتشعر وكأن الكاتب يحدثك شخصيًا بشكل ودي وفي نفس الوقت، تتسائل كقارئ هل سيكون ذلك سببًا في تواري اللغة العربية الفصحى كلغة سائدة في الكتب المصرية !

#اقرأ

#نادية

بنصح اى حد يقرا الكتاب ده

بيحطنا قدام نفسنا فى حاجات كتير

وبيفهمنا فى نفسنا حاجات كتير بنتغاضى عنها او مش بنشوفها

بيتكلم عن حاجات وحدود مهمة فى علاقتنا بنفسنا وعلاقتنا باللى حوالينا وعن اهمية اننا نقبل نفسنا ونسامحها عشان نعرف نكمل

نقبل بالحاجات القهرية اللى بتحصل عشان نقدر نكمل حياتنا

انا شخصيا ساعدنى كتير انى اعدى اصعب فترة عدت عليا فى حياتى

كتاب جيد جدا جدا وما يتأجلش قرائته وجاء فعلا في الوقت المناسب لي وبدأت معاه رحلة أتمنى تكون جيدة وتحقق المراد والسكينة لي،يجب مراجعة ما فيه من وقت لآخر وتلخيصه والكتابة مهمة جدا بجانبه واستخلاص واجبات حتى يكون الكتاب قد أدى وظيفته من الاستفادة به.

تم الانتهاء من قراءته يوم الخميس ٢٤ / ١١ / ٢٠٢٢

الكتاب لكل شخص تعب كثر م انداس عليه في علاقاته الكتاب لكل شخص بيدور عن علاقات صحيه قبل انه يدور يبدأ بنفسه الكتاب لكل شخص كانت دائمآ عنده مشاكل في علاقاته

الكتاب اختفي فجأه ... اين الكتاب ؟🤔