سفر القتل

الرواية بتحكي سلسلة من جرائم قتل غريبة.. بيتم تعذيب الضحية فيها وقتله بطريقة بشعة، بالإضافة لكون ابعاد الجرائم دي غير طبيعية!

زي ما يكون الشيطان بذاته هو الجاني!!

بيمسك القضية اتنين ظباط وهما احمد وفؤاد.. مع شيخ بيفهم في أمور الدجل وما يصاحبه، وكمان طبيب نفسي

الفريق دا بيضع كل جهوده لحل لوغاريتم القضية الغريبة دي.. لكن هل الامور هتستقر ام هتتفاقم؟؟

⚠️ يصلح العمل لمن هم 16+ ⚠️

للأسف انا تعبت اوي في قراءة العمل.. على الرغم من اني كنت متحمس جدا والفضول انتابني في الفصول الاولى.. لكن الحلو ميكملش

وكملته على مضض حرفياً

نتكلم علي السرد ومعاه يبدأ اول سلبيات العمل في وجة نظري.. هو في الحقيقة العمل يعتبر خالي من السرد.. دا حقيقي.. السرد مقابل الحوار الي كان عامية (ودي مش مشكلة عادي) يعتبر ٧٠٪ لصالح الحوار ويمكن اكتر.. الوصف والتعبير وغيره من أدوات السرد حرفيا كأنهم كانوا بيترموا بلا اهتمام او إبداع.. ودا عملي حالة تشبه كأني بقرأ مسرحية مش رواية أدبية!!

وصف المكان شبه معدوم!!

شخصيات العمل معظمها مسطح، بالرغم من كون الكاتب حاول يعمل لبعضهم خلفية تاريخية إلا ان برده الوضع كان سطحي وبلا روح.. كل الشخصيات تقريبا بتتكلم زي بعض..

و التعبيرات زي الغضب والفرح والخوف.. كانت مش موجودة (إلا في بداية العمل وهو احلى جزء اصلا)

نيجي بقا لأهم نقطة.. دي رواية تصنف علي انها اثارة وغموض ورعب، صح

وبصراحة مع تقدمي في صفحات العمل كان معدل التقريب عمال يقل أكتر..

بسبب ان العمل ماشي علي وتيرة واحدة، خط واحد بلا تصاعد في الأحداث، الي هو انت عارف الي هيحصل عارف مين عليه الدور وعارف انه كدا كدا هيموت ونفضل كدا لحد قُرب النهاية..

انا فعلا مش هنكر اني في بداية الرواية تحمست وكان في مشاهد رعب ومشاهد اثارة، بس مع ثبات الوتيرة كل دا مات.. حتى الاهتمام الي كان عندي ان اعرف القاتل دا بيعمل كدا ازاي وهل هو بشري ولا حاجة تانية مات.. عشان مفيش تصاعد مفيش حدث جديد بيدخل يقلب الموازين!!

نهاية العمل كانت سريعة وعشوائية وتم شرحها بالحوار الكتيييير اوووووي، طب حتى اعمل فلاش باك واشرح بسرد 😐

واصلا مش مفهومة.. وكانت محتاجة شرح اكتر ومشاهد توضيحية اكتر وكانت مملة.. انا قرأت معظم العمل في ثلاثة ايام. وفصول الخاتمة لوحدها خدت مني خمس ايام من كتر ما انا فقدت الشغف والاهتمام ناحية الرواية..

للأسف عمل مش حلو في نظري مع أن الفكرة حلوة ويجي منها، وهعيد تاني اني كان عندي فضول وترقب في البداية بالرغم من ضعف السرد وقلته.. والنجمتين دول للتلت الاول فقط او نصه كمان..

التقييم ⭐⭐

سفر القتل

كنت قرأت رواية "غرفة كانبرا" للكاتب محمود وهبة وكانت جيدة - وها هي رواية جديدة :)

لغة الرواية هي الفصحى سرداً والعامية المصرية حواراً.

الرواية بدأت بالكثير من الغموض وذكر الأعمال ونجمة داوود - وأنا مش غاوي الكلام ده بس لإن القصة بدايتها إن واحدة اتقتلت بطريقة عنيفة وغريبة والبوليس بيحاول يفك غموض القضية - فالقصة اتقلبت بوليسية وده ضبط الموضوع معايا.

الحوار كثير في الرواية وده علشان الشق البوليسي وطريقة التحقيقات من سين وجيم فكان كويس.

فيها شوية حاجات محتاجة تتراجع من الكاتب - زي مثلاً ان صحفي يتكلم ويهاجم الداخلية ورئاسة الوزراء ويسيبوه - هو الكاتب مش معانا في البلد ولا إيه؟ 😅

ضباط المباحث مش بيجروا ولا القضية وسايبين شيخ يفك الشفرة وده مضعف موقفهم في نظري الصراحة - فمثلاً ما حاولوش يربطوا بين الضحايا بالأدلة غير بعد الضحية الخامسة!

الفقرات اللي بيبدأ بيها الكاتب الفصول فيها الكثير من الفلسفة ومالهاش لازمة خالص!

الفصل الأخير نزل الرواية نجمة - يعني كان فيه تويست كويس بوظه الكاتب بإضافات مالهاش داعي بوظت الحبكة وعملت مشاكل في الترتيب المنطقي للأحداث ودخلت نقط أضعفت الرواية!

استمعت إليها على تطبيق ستوريتيل.

#فريديات

وكأن الكتاب (من الملخص عنه)، يتشابه الى حد ما مع رواية "فندق درب الوطاويط"، لأحمد مراد.

لكن لا أستطيع التأكد الا بعد قراءة هذا الكتاب.

بصراحة وبدون كلام كثير أنا استمتعت بقراءة الرواية جدا بدون ذرة ملل و النهاية كانت كثيرة المفاجآت و حبيتها

رووووعة😍