اقتباسات من كتاب سيلفي Selfie

في الختام،

فيه كلام محتاج أقوله بس مش لاقي الكلام،

فيه حاجات محتاج أقولها، وانتي عارفة إني خيبة،

وإني بتلخبط ف اسمي،

وإني باعرق لمّا افكَّر

وانتي عارفة إن إنتي سكّر

وإني من غيرك وحيد،

وإني صايم طول حياتي

فجأة شوفتك جايّة عيد

وإني مش عارف أعبَّر

أو أبيِّن شيء جديد

أو أقول لك يعني مثلاً

انتي نجمة فووق بعيـــد !

ف مين اللي قال الهروب مسؤولية؟

ومين اللي قال إن لم "الدراهم"

هيجعل ولادك يحسوا بأمان؟

أنا أعرف غلابة وعمّال نضافة

عرقهم بيملى الزمان والمكان،

وكل الفلوس ف البنوك والأراضي،

ما تسواش وجودهم ف لمّة فطار!

سلام للي عيّط وساب قلبه واقف،

بيستنى أبوه عند باب المطار!

لكن برضه عيب أني ألوم اللي سافروا

وتعبوا وعافروا

وآمنوا بوطنهم لحد أمّا كفروا

أكيد همّا يعني قلوبهم بتبكي

مفيش حد عاقل بيتمنى غربة

لكن لو بلدهم بتقتل بقسوة

فلازم هيمشوا مادام هيّ "تربة"

واكتب لكم عن حبها ..

"كان لابد أحبها"

علشان كده دونًا عن الألف اللي حضروا حفلها

أنا الوحيد اللي خبطت ف كتفها!

هيَّ

تلات أمتار من البهجة،

خمس أشبار من المرح الطفولي والندى

تقدر تقول "مصر الجديدة"

قبل ما جهاز المدينة

يجبر الشارع على استقبال مزيد م الإعلانات،

والإعلانات على قد ما بتكبر

بيزيدوا الضحايا في المدن،

حسب اتساع الإعلانات

أو ربما

حسب اتساع صدر الأهالي في المدن

هي الصدف نفس الصُدف جرحي القديم بان فيك

عمرك ما ترضى بالقدر حتى إن زمان بنا فيك

من غير نظر شفتك حزين من غير ما ابص أنا فيك

يمكن يكون دربك جنوب وتعيش بقلب شمال

خانك نصيبك ف الرؤى واتهز فيك وجه مال

مش معنى إني اعترفت بيّا لابد أكون بنفيك!