اقتباسات من رواية تحت السرير: حكايات وبورتريهات بالعامية

الحواديت كانت بتتكَب منها على السجادة، فوق الرفوف، بتكرمش مفرش السرير، بتخبط بصوت عالي على الأطباق اللي بياكلوا فيها…

‫الولد أبو ودان صغيرة مكنش بيحب يتكعبل،

‫ومكانش بيعرف يصبر عليها لحد ما ترتب كل حدوتة في مكانها..

كتبت اللي نفسي أعمله في نوتة زرقا:

‫١- أروح فرنسا.

‫٢- أطلع في برنامج شبابيك مع سلمى.

‫٣- أعمل نجفة بالورق.

‫٤-…………

‫كل ده عملته.. بالصدفة أو بالمحايلة.

‫وبالصدفة أو بالمحايلة اتبسطت.

‫ورُحت لأبعد من فرنسا..

سألته عن الدنيا.. ضحك!

‫قالي: شَربتها من كاسي علشان تفضل تجري ورايا..

‫قالي إن البنات هما مسامير القرنفل في كوباية الشاي..

‫وإن اسكندرية أول بنت باسها وحبها..

«فلمنجو» مبيعرفش يرقص..

‫لكن بالصدفة طلع صوته حلو..

‫سمعته بيغني للشيخ إمام، وشفته بيوشوش أول ضفدعة عملها بورقة بيضا..

‫وسمعت كمان الضفدعة بتوشوشه بسرها اللي فتحله باب الحكايات.

عيني كانت على دلاية دهب دايمًا قريبة من صدرها، عزت عليا نفسي أطلبها..

‫هي كانت قشرة بس عليها اسم ربنا..

‫قبل ما تموت كانت حاطه كف مريم في برطمان إزاز ملياه ميه وساندة بيه باب أوضتها.. أخدته حطيته تحت سريري

«العادب ينطب والمالح ينكب»

‫- هو أنا عَدبة يا ستي؟

‫-انتي كراميلا..

‫ستي كانت أكتر واحدة بتتفائل بيها البيوت في النوبة..

إهداء

‫إلى روح خالتي «كاميليا»

‫وكل اللي عاشوا حياتهم يحطوا العسل ع السمك..

الله يلعن أبو الظروف اللي خلت الولاد تلاقي خيرها في بلد غيرها..

‫لما بنقلع اليونيفورم الشيك بتاع الفندق بنبقى ناس تانية.. بنبقى غلابة أوي…

‫أنا خريجة أحسن معهد بيعلم مساج في الغردقة. كنت أشطر واحدة في البنات اللي معايا، الكابتن كان دايمًا يقولي: يا «عاليا» انتي ايدك تتلف في حرير!

«الرحمة» في بلد تانية. «الرحمة» شارع بيطل ع الزبالة.. مبيسكنهاش غير اللي بيشوف الدنيا من خرم بابها،، أواللي عنده فيها محل ملك أو إيجار .

ولأن ودانه صغيرة معرفش يسمعها كويس. ‫نام من نص أول حدوتة، ‫البنت اللي قلبها مليان حواديت اضايقت ومحاولتش تحكيله تاني، ولا هو طلب يسمع تاني. ‫جاتلها فكرة إنها تجمع كل الحواديت وتحطهم في سَبت خوص مربوط بحبل تخين وتنزله من البلكونة...قررت توزع حواديتها على الناس

‫وكأني كعروب متعلق بجلابية «رعراعة».. مستني خلخالها يلمس الحتة الساقعة اللي جوايا وهي بتلم الكعاريب من الغيط.. يناغشها، ويديها على قد نيتها..

"ساعات بتحسي إن نفسك الدنيا تمطر جواكي"