دبحتني لغتها، دبحتني طريقتها في التعبير عن المشاعر الإنسانية.
مكنتش المرة الأولى اللي أقرا فيها لنور عبد المجيد، كانت التانية بعد رغم الفراق، نفس الحاجة حصلتلي في الاتنين لغة رائعة تخليك مش قادر تسيب الرواية من إيدك و عايز تعرف إيه اللي هيحصل بعد كده ..
لكن ..
لكن شوية حاجات، فيه عامل مشترك في الروايتين ومعرفش إن كان موجود في باقي رواياتها ولا لا وهو تساؤل بصراحة ليه دايما بتكون البطلة بارعة الجمال ودايما بيضا وعنيها ملونة وشعرها بني وكل الرجالة بتتمناها وليه دايما البطل وسيم لدرجة الحقد والحسد ؟!!!! ليه دايما الأبطال بيعيشوا في مستوى اجتماعي ومادي فوق العالي ده إن مكانوش كده من الأول ؟!!! أنا مش من الناس اللي كانت بتنتقد المسلسلات اللي بتتطلع فيها الفيلات والقصور والناس الجميلة المستحمية وتقول إنها لا تعبر عن الواقع أو لا تنطبق على قطاع عريض من الشعب ، بالعكس كنت بتقبلها جدا، لكن هو بس مجرد تساؤل؟ ليه في المرتين كده؟
بالنسبة للمرة دي أنا كنت بادئة الرواية وبصرخ من المتعة من الجمل الرشيقة الجميلة والتعبيرات اللي مش هقول بتمس القلب لا دي لسان القلب نفسه، لكن جيت عند الجزء لما هتكتشف إنه خانها ومقدرتش استحمل بصراحة .
الخيانة مرة. الخيانة صعبة. الخيانة قاسية وبتدبح. لكن مش قادرة استوعب إن واحدة حد حبها وهي حبته كل الحب ده ومتغفرلوش إنها خانها في مرة!!! والله العظيم ماببرر الخيانة وحاسة أوي الشعور بتاع الحد اللي بيتخان بالذات لو كانت واحدة في مواصفات البطلة وعملت كل التضحيات دي، لكن يا سيدتي نساء كل يوم بيتدبحوا في اليوم مية مرة علشان رجالهم بيحسسوهم بأنهم ولا حاجة، علشان بيغقدوهم ثقتهم بنفسهم، علشان بيفضلوا عليهم ستات تانية مش بيحبوهم بنفس القدر، علشان بيخونوهم مليون مرة إن مكنش بكامل جسمهم فبعنيهم، علشان مبيقدروش مقدار حبهم ليهم، علشان بيتجاهلوهم، علشان بيعاملوهم ببرود، علشان من كتر ظلمهم ليهم بيجمدوهم وبيخلوا لسانهم ومشاعرهم زي البركان اللي تحت صفحة المية الهادية، علشان بيجبروهم يتعاملوا معاهم بالوش التلج من كتر ما دبحوا كرامتهم، علشان بيحسسوهم إنهم العجلة الاحتياطية، علشان بيعذبوهم بغوصهم في ذكريات ماضيهم الجميل اللي رحل ومش عارفين يرجعوله، ألف وألف طريقة بنتدبح بيها كل يوم أكتر من مرة خيانة بعد كل الحب ده !! وبعدين قلت ماشي أنا اللي بقيت متخدرة من كتر الوجع ومتبنجة فمبقتش بحس. موجوعة أي حد في مكانها هيتوجع ويفكر في الانتقام وفي الخيانة علشان يرد الصفعة. بس ما بيقولوش إننا بنعمل كده علشان خاطر ولادنا ولا علشان خاطر آبائنا في قبورهم !!! أي منطق وأي شعور اللي يقول كده ؟!!
لو كانت عزة هي اللي خانت زياد كنت تعاطفت معاها أكتر بكتير:(
في النهاية حاجة نسيت أقولها امبارح، في شئ مهم جداًاتعلمته من أنا شهيرة أو وصلت فيه لقرار يناسبني بالنسبة لي قيد الحب أفضل وأقوى من قيد الوفاء. قيد الحب بيخلي الناس اللي بيحبونا قابلين كل عيوبنا ونواقصنا ومستمرين في التعامل معانا علشان هما بيحبونا وميقدروش يعملوا حاجة غير كده ، لكن قيد الوفاء بيبقى عبأ عليهم بيخليهم يحسوا بأنهم مقيدين فعلاً غصب عنهم وإنهم لازم يفضلوا معانا علشان إحنا قدمنالهم كتير مش علشان هما حابين يفضلوا معانا حتى ولو مش بنقدملهم حاجة، قيد الوفاء بيخليهم ينسوا حتى حبهم السابق لينا ويركزوا بس في رغبتهم إنهم يردولنا اللي إحنا عملناه علشانهم بتبقى حاجة مصطنعة مهما طالت مش بتدوم ولازم يجي وقت العبأ ده يخليهم يخونوا .
