اقتباسات من كتاب كلام أبيح جدا

الشيء الغريب إن مصر بعد ما قامت ثورة يوليو والإنجليز سابوها ومشيوا .. خدوا معاهم اللغة العربية وسابونا نرطن بالانجليزي! لزوم الوشنة والاستايل والنيولك .. وبدأت ألفاظ الانجليزي تفرض نفسها على كلامنا.

ورغم الثورة الاخلاقية على كل الكلام الأبيح في الفن والصحافة ووسائل الإعلام، لا يوجد أي رد فعل تجاه الأفعال القبيحة فعلاً المنتشرة في مجتمعنا.

الكلمة سمعتها سيئة .. ليها جرس ع الودن مزعج .. كأنها كلمه أبيحة .. الكلمة هي .. أنا آسف .. مضطر أقولها .. يا ريت الأطفال الصغيرين يسدوا ودانهم .. عشان أقول الكلمة ..

‫ الكلمه هي .. الضرايب .!

‫ أجاب ببراءة

‫ - عديت الخمسة وتلاتين سنة ولسه مش معرس؟

‫ قلت له

‫ - هو لازم بدري كده؟!!

مشكلة اي كاتب إن المادة الخام اللي بيشتغل بيها هي الناس .. يعني لازم عشان تكتب تعيش .. واللي يعيش ياما يشوف .. طيب عاوزيني أشوف وأسكت .. ما هو أنا لازم أتكلم عن الناس .. ويزعلوا بأه .. ما أنا لو ما كتبتش ح أطق .. ح افرقع .. والكتابة برضة لازم يبأه بيها شيء من الندالة وقلة الأصل .. واللي أنا ح أكتب عنهم أهم عارفين نفسيهم .. واللي على راسه بطحة يحسس عليها ومش عاوز يحسس عليها .. يسيبني أنا أحسس ..

نستحمل ليه يعني كلامهم الغريب وتعبيراتهم اللي تفقع المرارة؟! عشان ايه يعني؟! علشان السفلة دول أولادنا؟! وهما عشان طلعوا لقوا نفسهم أولادنا يحرقوا دمنا؟! شفتوا العيال بتتكلم ازاي؟! طريقة حقيرة في الكلام وجمل متركبة غلط مش عارف جابوها منين وقال أيه .. مش عاجبهم كلامنا؟!

الشيء الغريب ... إن كل الحاجات اللي بطلناها علشان الشملول .. هو بدأ يمارسها ,, حريقة سجاير وما بياكلش غير ماكدونالدز وجيبناله عربية قسط .. وكل يوم نازل بطقم جديد.

مشكلة الصيّع والحراميةإنهم ما يعرفوش إحساس واحد جبان ماشي في شارع ضلمة.

بعد الحادثة .. كل حاجة تقريباً وقفت في الوزارة.. محدش قدر يقول. -(خلاص بأه يا جماعة كل واحد يروح شغله).

ولا حتى السيد الوكيل قدر يقولها .. لان جملة زي دي لو اتقالت حتتفهم غلط .. ولو اتنقلت بعد كده لمعالي الوزير ممكن تودي في داهية .. ووقف كل موظفين الوزارة قصاد بعض كأنهم بيمثلوا مسرحية وكل واحد خايف ينكشف قدام التاني...