ويسترن يونيون فرع الهرم

كلام بسيط وبيلمس القلب , كأنك بتتكلم مع حد عارفه من زمان و تلاقيه فاهمك وبيوصف اللي نفسك تقوله,, فكرت اديله 4 نجوم بس عشان المانيفستو اديتله 5 نجوم لأنه أقوي شوية,, بس ده مينفعش له اقل من الخمس نجوم.. قريته كله مرة واحدة ف حوالي نص ساعة.

فلسفة مصطفي إبراهيم واضحة جدًا بين السطور

بس ده لا يمنع إن بعض القصائد لو أقدر أسميها قصائد مش كانت في نفس مستوي الباقي

وزي ما كنت متوقعة

كانت هتفرق في الوداع هي أقوي قصيدة في الديوان كلة

وكان ختامه مسك بيها بصراحة

ديوان مفرداته بسيطة الى أبعد الحدود بس بتحمل معانى عميقة جدا .. مصطفى إبراهيم اضافة قوية جدا للشعر العامية المصرية.

اقتباس :

نظرتها ليك حتى ..

ساعة ما بصتلك ..

لو دامت لعين غيرك ..

مكنتش وصلتلك ..

بدون سبب واضح عشان أزعل..

أنا زعلان..

وفجأة بدون سبب برضه يفرحني..

أنا فرحان..

لا مني عرفت اعمل أيه عشان ما ازعلش من تاني..

ولا من عرفت إزاي؟!

أدوق الفرحة بالمجان..!!

مفهاش حاجات ببلاش

صوت قفلتك....

لأخر سوسته ف الشنطه.....

صوت طبطبة ايدك....

بالراحه ع الباك باك....

فرافيت تذاكر سفر....

قطّعّتها اونطه....

سندة عنيك وايديك....

ف الباص على الشباك....

فيه حاجات كتير عايزاك.....

تفضل كده مسافر.....

ف طريق ملوش اخر ....

إكمنها حتموت....

ف الرحله من غيرك....

فيه حاجات كتير عايشاك....

خايفاك تبطلها ....

وحاجات كتير عايزاك....

لاكن معطلها...

أن إنتا مش عايز....

جايز...

حاجات منها....

حتعيش وتستناك ....

جايز حاجات تانيه...

ف الزحمه راح تنساك....

زي اللي راحوا زمان....

حتبطل الدخان ؟...

ولاعتك السخان ....

وسجايرك البوسطن...

حيموتوا من غيرك ...

حتبطل الاحزان ؟...

كشكولك المليان...

بـقصايدك الجايه....

حيعيش لمين غيرك ؟...

جسمك حجزله مكان...

بالعافيه جوه الكادر...

ميت ايد على كتافك....

ميت بصه على وشك....

كل الحاجات حواليك...

ف الكادر سانده عليك....

لو جيت وشلْت اديك....

الصورة تتفركش ....

ضلك على الحيطه ....

كان خافي عنها النور ....

وطلّعها بتنغمش....

كفك على السفره....

من غيره كان إزاي...

مفرشها يتكرمش ؟....

بصمة صباع إيدك...

لسّاها ع الشبابيك...

ميت ألف تفصيله...

ملهاش وجود غير بيك....

وإنتا عليك تختار...

حتبدّي مين على مين ؟....

وتبدّي إيه على إيه ؟....

الجاي والجايين ؟

وللا اللي خدت عليه ؟

أصل الحياه للعلم....

مفهاش حاجات ببلاش....

وعشان ماتصبح فيلم.....

وأصلا عشان تتعاش....

كادر الحياه المشحون...

فرح والم وشجون....

لازم يكون ...بيلف....

لازم يكون.... بيدور....

يتقل عليك ويخف....

ويعشّمك بالنور....

ف نهاية المشوار.....

ونا قلبي لف و دار.....

ميت ألف ليل ونهار....

نفسه ف فرحه كادوه.....

وحلاوه من غير نار....

ومّا الزمن تعبه...

قصقص شريط الفيلم....

وخَد كادر كان عاجبه....

وقرر يعيش ف الحلم.....

و الحلم كان كامل...

جدا تمام خالص...

ولجل الكمال لله....

كل الحاجات جواه....

لاكن في شيء ناقص....

فاضي بشكل غريب....

إيه اللي سبته هناك؟...

ف تلاقي ف الكراكيب....

صورة القمر وياك ...

متشاله ف الكشكول...

باصه ف عنيك علطول...

وكأنها بتقول ....

بالذمه مش واحشاك

برواز الدنيا..

الصورة قصادك ممدودة...

و مش محدودة...

بالطول و العرض...

و البرواز ضلعه الفوقاني...

ف السما....

و التاني مساوي الأرض...

و بما إنك حيلتك بس عينين...

ف قصادك حل من الإتنين...

يا تقرّب جامد م الصورة...

و تاخدلك كادر تركز فيه...

و تعيش حكاويه...

و ساعتها مفيش..

و لا كادر يعيش...

و يكونله لزوم...

غير كادر الزووم...

أصغر تفصيل ف الصورة يبان...

ريحة الدنيا و طعم الأحداث...

الفرق ف تدريج الألوان...

شكل التجاعيد ف وشوش الناس...

ف تعيش مستمتع بالتفاصيل...

الجهل... جميل...

بيقربلك سقف النشوة...

و الحزن كمان...

أما لو اخترت إنك تبعد...

و تشوف المنظر من برة...

حتغطي عينيك كادرات أكبر...

و حاجات أكتر...

لكن أحجامها بقت أصغر...

م الأول ميت مليون مرة...

تكتشف إنك...

مبقتش في حاجة تأثر فيك...

و لا بتبكيك...

مبقتش بتزعل تقريباً...

و الدنيا بقت أبيض فاقع...

و إن انت بقيت إنسان ساقع...

مبقيتش بتضحك بالساهل...

و لا حاجة ف نظرك تستاهل...

تتمنى ساعتها تعود جاهل...

ف تلاقي الزووم...

كان رايح بس...

و لجل النحس...

مفيش راجع.

قصيدة سفينة نوح

________

الليل كما الغربال

أما النهار بيلمّ

و العبرة ب اللى ابتدى

قبل العدد ما يتمّ

يا عبادة وسط الهَرَج

يا قِلّة جايبة الفرج

الثورة ركعة قضا

مفهاش إمام بيئمّ

يا معشر الثوار

الكل فيكوا إمام

يا جنرالات انزلوا

المعركة قُدّام

الثورة مفهاش رتب

غير رتبة العسكرى

و لا حد غير العَلَم

راح ينضربله تمام

و آدى سفينة نوح

جوا الميدان طافية

بتلِمّ فيها يا مصر

من كل زوج ألافات

يتلَمّ فيها النوح

ع الضحك و القافية

يتلَمّ فيها الصبر

على رنّة الهتافات

نتحامى وقت الهوا

م الموج ف بعضينا

والشقّ..نلضم سوا

و نسدّه ب إيدينا

و مهما الطوفان يعلى

نطلع و نعلى معاه

سيبوا الطريق لله

العبرة بالمينا

يا شعب مستناش

خد حقه بدراعه

يا وطن ما بيساعناش

و احنا اللى بنساعه

الدم لون واحد

مفهوش عبيد ولا سيد

و إن بعتوا دم شهيد..

بكرة حتتباعوا

قصيدة سفينة نوح

________

الليل كما الغربال

أما النهار بيلمّ

و العبرة ب اللى ابتدى

قبل العدد ما يتمّ

يا عبادة وسط الهَرَج

يا قِلّة جايبة الفرج

الثورة ركعة قضا

مفهاش إمام بيئمّ

يا معشر الثوار

الكل فيكوا إمام

يا جنرالات انزلوا

المعركة قُدّام

الثورة مفهاش رتب

غير رتبة العسكرى

و لا حد غير العَلَم

راح ينضربله تمام

و آدى سفينة نوح

جوا الميدان طافية

بتلِمّ فيها يا مصر

من كل زوج ألافات

يتلَمّ فيها النوح

ع الضحك و القافية

يتلَمّ فيها الصبر

على رنّة الهتافات

نتحامى وقت الهوا

م الموج ف بعضينا

والشقّ..نلضم سوا

و نسدّه ب إيدينا

و مهما الطوفان يعلى

نطلع و نعلى معاه

سيبوا الطريق لله

العبرة بالمينا

يا شعب مستناش

خد حقه بدراعه

يا وطن ما بيساعناش

و احنا اللى بنساعه

الدم لون واحد

مفهوش عبيد ولا سيد

و إن بعتوا دم شهيد..

بكرة حتتباعوا

فى حاجات علشان نعرف درجه قوتها بنكسرها

وحاجات ف ادينا علشان نعرف اننا عاوزنها بنخسرها

كدبت ف عمرك كام صاحب علشان كان نفسك تطمن

وخسرت اصحابك واطمنت

طب كام بلون فرقعوا منك وانت بتنفخهم على الاخر

وعرفت اخرهم بس ندمت

دلوقتى فهمت انا عاوز ايه

انا كنت بفرقع بلالين ليه

انا عاوز حاجه بدون اخر او حتى باخر موصلوش

كام حيطه ف ضهرى اضرب واهرى ف بدنهم بس ميتهدوش

شئ مش مغشوش مضمون دايما من غير ما احتاج انى اتاكد

او حتى اخاف انى اتنكد ليكون ف الاخر برضه فاشوش

يا بشر عارفانى وعارفه انا مين

بلغوا اسفى لكل البلالين

كلنا كنا ف يوم بلونه وفقعتنا تجارب بنى ادمين

بلالين عايشين نفسها تلقى

حد يصدق ويقدرها ويتأكد من انه عاوزها

من غير ما يجرب يخسرها

مفهاش علامة طرح

اللي انكتب بالجاف….

مابيتمسحش خلاص…

والدنيا مفهاش حرف بينكتب بـرصاص…

كفّرت سب الدين…

إطعام عشر مساكين…

وصيام تلات تيام…..

رجعت ذنوبك بكر؟

وجمعت موجب سين….

على كل سالب سين…

ف معادلة الايام….

عشمان تعود للصفر؟

صدقني كله كلام ….

بنقوله لجل نعيش ….

وحتكتشف قدام …

التوبة مابتمحيش…

وإن الحساب كداب ….

لو رجّعك لمفيش …

صفر الحياه اللي انفض….

بقي مستحيل يترد ….

وعجل الحياه ممشيش …

وما داسشي فوق الأرض ….

من قبل مايعلّم….

بـعجلته على روحنا….

كل أما نتألم….

من شيء بـيجرحنا…

نشطب عشان نرتاح….

بالجاف مكان الجرح….

لا فيه توبة تمحي جراح…..

ولا حزن ننساه بـفرح ….

والدنيا جمع وبس….

مفهاش علامة طرح..

طالما قرأت المانيفستو قبله يبقي اكيد مش هيعجبني العجب.

بس الديوان حلو حقيقي

01

برغم إن الكلام ع الحب من نظرة كلام متعاد

وإن الصدفة أحيانا بتبقى بألف ألف ميعاد

ورغم إن الكلام أصلا بينقص حاجة كل ما زاد

ورغم إني جدع وتقيل وعمرى ما أقولها بالساهل

أنا نفسى أقولها لك فـ أول مرة نتقابل

فلو كان المكان يسمح وست الكل لو تأذن

أنا عايز أقول إني بحبك من زمان جدًا

02

نفسي أسمع نكتة حلوة

مسمعتهاش قبل النهاردة

و أضحك لحد ما بطني تقفش

و حاشتم اللي يقوللي اهدا

و تكون قبيحة مفيش مشاكل

أو حتى تودي ف شناكل

أصل اللي زيي شارب و واكل

م الحزن لما قلبه صدا

شئ خيالي !!

ديوان حقيقي اوي .. صادم .. معبر .. بسيط

قال حاجات كتيييييير جدا حقيقية و عبر عن حاجات كتييييييير جدا موجودة جوه كل واحد فينا بطريقة فنية بسيطة جميلة ممتعة

الكتاب خلصته في نص ساعة بس !!

انا ماكنتش مستوعب إيه الي بيحصل و انا بقرا الكتاب !!

هاتحس إن في واحد دخل جوه دماغك و كتب منها حاجات كتييييير في الكتاب ده

كتاب يستاهل اكتر من خمس نجوم بكتييير :)

كتاب لازم يتقري اكتر من مرة :)

مصطفي إبراهيم .. فنان بجد :)

مصطفى ابراهيم هو شاعرى المفضل من الشباب

احساس عالى

شعر مؤثر

موضوعات متنوعة

فيه صدق فيه تلقائية

وفيه حاجات اثرت فيا جدا فى الكتاب ده زى

بدون سبب واضح عشان أزعل..

أنا زعلان..

وفجأة بدون سبب برضه يفرحني..

أنا فرحان..

لا مني عرفت اعمل أيه عشان ما ازعلش من تاني..

ولا من عرفت إزاي؟!

أدوق الفرحة بالمجان..!!

----------

القدر مش امر واقع

او قضية منتهية

القدر تخمين الهى

احتماله مية مية

----------

الخلاصة شعر ممتع

اسم الكتاب : ويسترن يونيون فرع الهرم

الكاتب : مصطفى ابراهيم

فئة العمل : شعر عامية

عدد الصفحات: 132

دار النشر : الكرمة

تقييم: 5

تاريخ القراءة: 31 يناير 2023

تمت قراته عبر : ورقي

إنه أبانا الصايع الذي علمنا الشعر، وكتب لنا كيف نحب فلسفة هذه البلد الخاوية من الفلسفة.

حفظ الله مصر والشعر ومصطفى ابراهيم.

_ سايا

مبدع مصطفى إبراهيم .. ديوان غاية فى الروعة

فلسفه عاليه يا مصطفي :)

ديون تميزه في بساطته.