اقتباسات من كتاب رباعيات صلاح جاهين

ظهر المسيح الحي علي سفح ربـــــــــوة

و نزل بهالة الضي و قعد في قهـــــــــوة

بصوا .. تعالوا .. قالوا خليه في حالــــــــه

الناس في حالهم يا بني .. مالهمش دعوة

عجبي !!!

من بين شقوق الشيش و شقشقت لك

مع شهقة العصافير و زقزقـــــــت لك

نهار جديد انا . . قوم نشوف نعــمل إيه

انا قلت يا ح تقتلني .. يا ح اقــــــــتلك

عجبي !!!

قتلوه من التعذيب وقالوا انتحر..

فكرت لحظة وقلت: آه يا غجر!..

لو جنسكم سيبناه يعيش في الحياة..

اللي انتحر راح يبقى جنس البشر

عجبي!

صوتك يا بنت الإيه كأنه بدن

يرقص يزيح الهم يمحي الشجن

يا حلوتي و بدنك كأنه كلام

كلام فلاسفه سكروا نسيوا الزمن

إنسان أيا إنسان ما أجهلك

ما أتفهك في الكون وما أضألك

شمس وقمر و سدوم وملايين نجوم

وفاكرها يا موهوم مخلوقه لك

عجبي !!

حاسب من الاحزان و حاســـــــب لها

حاسب علي رقابيك من حبلـــــــــــها

راح تنتهي و لابد راح تنتهــــــــــي

مش انتهت أحزان من قبلهــــــــــا؟

مع ان كل الخلق من أصل طين

وكلهم بينزلوا مغمضين

بعد الدقايق والشهور والسنين

تلاقي ناس أشرار وناس طيبين

عجبي !!

يأسك و صبرك بین إيديك وانت حر

تیأس ما تیأس الحیاه راح تمر

أنا دقت مندا ومندا عجبي لقیت

الصبر مر وبرضك الیأس مر

يا عندليب ماتخــافش من غنوتك

قول شكوتك واحكى على بلوتك

الغنوة مش ح تموتك إنما

كتم الغنا هو اللى ح يموتك

عجبى !!

فتحت شباكي لشمس الصبـــــــــــــــــاح

ما دخلش منه غيــــــــــر عويل الريـــاح

وفتحت قلبي عشان أبوح بالألـــــــــــــم

ما خرجش منه غير محبه وسمــــــــاح

عبثا باقول واقرأ في سورة عبس

ماتلومش حد إن ابتسم أو عبس

فيه ناس تقول الهزل يطلع جــــد

وناس تقول الجد يطلع عبـــــث

سهير ليالي و ياما لفيت وطفت

وف ليله راجع في الضلام قمت شفت

الخوف … كأنه كلب سد الطريق

وكنت عاوز أقتله .. بس خفت