انا لاول مرة اقرا شعر لتميم البرغوثي..ولكن ادهشني اسلوبه و اختيار كلماته , لدية براعة وابداع فى اختيار الافلاظ وتعددها وتنوعها غير عادى
ذكاء لفظى فعلا عالى جدا
____________________________
قصيدة أوضة دي تحفة بجد
أنا اللي حاطط أحزاني في الأحباس و إن مرة هربت تحبسني أحزاني
و هيّ شاطرة تضحك على الحرّاس و أنا في ضلوعي سجني و سجّاني
____________________________
في العالم العربي تعيش
كما قط ساكن تحت عربية
عينيه ما تشوفش م الدنيا دي حاجة الا الجزم
في العالم العربي تعيش
كما بهلوان السيرك تحتك بهلوان دايس عليه
وفوق دماغك بهلوان دايس عليك
والكل واقف محترم
في العالم العربي تعيش،
مباراة بقى لها ألف عام
لعيبة تجري يمين شمال
والكورة طول الوقت في إدين الحكم
في العالم العربي، تقول للبنت حبيتك
وتبقى البنت بتحبك، وبتموت فيك
تناولك بالألم
في العالم العربي تعيش
تشتم في طعم المية والطعمية
والقهوة وروادها
وفى مراتك وأولادها
وحر وزحمة الأتوبيس
وفي اللي بيعمله إبليس، وفي التفليس
ولو سألوك تقول الحمد لله ربنا يديمها نعم
في العالم العربي تعيش
كما دمعة في عيون الكريم المحنة تطردها يرجعها الكرم
في العالم العربي تعيش
تلميذ في حوش المدرسة
من غير فطار
عينه على الشارع وبيحيي العلم
في العالم العربي تعيش
بتبص في الساعة وخايف نشرة الأخبار تفوت
علشان تشوف ع الشاشة ناس
في العالم العربي
تموت
____________________________
الملك الأسود في الشطرنج
وقف قلقان
قدامه ميدان
مليان دخان
ورماح وسيوف
بيبص يشوف
الجيش مكشوف
فرسانه الزنج
الموت أستيكة وهمه حروف
سكرات البنج
منبه خوف
خض الفرسان
عدل العمة ونفض العفرة عن القفطان
أصل السلطان
كان ودي عساكره تدافع عنه ف كل مكان
كيف ما بداله
يمينه شماله
ودٌي رجاله
علي أفياله
وخيل خياله
حتي الطابية اللي باقياله
ووزيره وحاله ومحتاله
يموتوا بداله
في الأول كان هادي باله
موتهم مش مشكلة بالمطلق
دول بيموتوا لجل حياته
لكن لما الوضع تطور
فجأة تذكر
إنه العسكر
لو ماتوا
وبقي لوحده
من غير جنده
وحماته
حتما يخسر
حك اللحية ملكنا وفكر
ملك الأبيض برضه مقلق
هو صحيح عايق ومشبرق
لسة العفرة ما وصلتلوش
بس الحظ ما بيحبوش
في العادة بيخسر حروباته
وحظ الملك الأسود يفلق
جند الأبيض هاجم أيوه
بس مفرق
والدنيا مش دايما حلوة
يبقي عدوك عايز غلوة
تيجي عليك من دونه البلوة
الأبيض فاقد أعصابه
والأسود موته علي بابه
من فتحة ما بين فارسين
بصوا علي بعض الأتنين
لحظة وجات العين في العين
الأتنين بصوا علي بعض
والقتلي ماليين الأرض
عرض الأول ع التاني
قام التاني قبل العرض
وادي يا سيدي نص جوابه:
بعد السلام
يا جلالة الملك الهمام
أعرض عليك وقف الخصام
عارف جلالتك طبعا انه اللعبة دي
ما بتنتهيش
إلا إذا واحد من الملكين يموت
لكن إذا ماتوا الجنود م الجانبين
نقدر أنا وإنت نعيش
و اللعبة تخلص بالتعادل
وعليه يا صاحبي المبجل
أطلب إليك ارسال جيوشك للتقاتل
حيث تُقتل
وأنا كذلك بالتبادل
و اللعبة تخلص بالتعادل
زي ما أسلفت لك
ويا حبذا أيضا إذا ما حلفت لي
وحلفت لك
إن العداوة بينا تصبح كالمفيش
وبلاها جيشا
ثم السلام أحسن ختام
يا جلالة الملك الهمام
قُبل الحل الأنساني
من غير كاني ولا ماني
وراح الجند المتفاني
ميت فاني
وفضلوا الملكين الأحرار
يتلقوا مباركة وتهاني
لاجل إيقاف إطلاق النار
صبح الأسود والأبيض
أحسن أحباب
وبقوا جيران الباب في الباب
صبح الأبيض والأسود
زي الأخوان
ما بقاش ده أبيض ولا ده أسود
لكن ألوان
واتشبًك نسج الأنساب
زينة وبهرج سلطاني
نور الرضا تحت تيجانهم
ماليين نشرات الأخبار
وفضلوا العسكر ف ميدانهم
موتي حافظين الأسرار.
____________________________
ده تار طويل
من جيل لجيل
والطلقتين
متحوشين
والرد دين
يا إٍسرائيل
إزاي حننسى ظلم فات
وهو متعاد ع الشاشات
ضرب العيال بالدبابات
هد المدارس ع البشر
كيف تتنسي بحر البقر
والدم فوق الكراسات
نفس الوطن نفس القتيل
وده تار طويل
من جيل لجيل
والطلقتين
متحوشين
والرد دين
يا إٍسرائيل
حق الجنود الأسرى فين
يتقتلوا متقيدين
سرقوا دبلهم م الايدين
وحقهم في القبر راح
وجراح تفكرنا بجراح
صبرا وشاتيلا ودير ياسين
نفس الوطن نفس القتيل
وده تار طويل
من جيل لجيل
والطلقتين
متحوشين
والرد دين
يا إٍسرائيل
____________________________
أدِّي التحية العسكرية للعيال
عدلوا ميزاننا بعد ما ميزاننا مال
وصباع بيتشاهد وبيعيد السؤال
يا مصر مين فينا اللي تحت الاحتلال
أدِّي التحية العسكرية للبنات
شنط المدارس ضد صف الدبابات
تبكي ولا تقبل تعازي في اللي مات
تغلب دروع العسكري بطرحة وشال
أدِّي التحية العسكرية للشجر
يطرح علم غصن الزتون اللي انكسر
يطرح شرر، يطرح بشر زي القمر
وان يقطعوه تفضل عروقه في الرمال
أدِّي التحية للي إدى الحق صوت
أدِّي التحية لشب حب الأرض موت
أدِّي التحية العسكرية للبيوت
تتهد تبقى حجارة في إدين الرجال
أدِّي التحية العسكرية للقبور
فيها زهور لؤلؤ بحور وبدور تدور
فيها بذور يوم القيامة والنشور
مهما حصل ثابتة ف مكانها لا تزال
أدِّي التحية العسكرية للغضب
وطريق مشي في المسيح لما انصلب
وحمام يطير بين المآذن والقبب
فوقها علامة نصر تشبه للهلال
أدِّي التحية العسكرية للعيال
عدلوا ميزاننا بعد ما ميزاننا مال
طرحوا سؤال و يا ويلنا من رد السؤال
يا اخواننا مين فينا اللي تحت الاحتلال
_________________________________
