مراجعات رواية مزاد الرب

رواية قوانين ما بعد الموت

للكاتب/ إبراهيم حلمي

النوع / رعب نفسي- غموض

*****

رحلة غامضة وأرض مجهولة، بتبدأ منها قصة بدايتها هي النهاية ونهايتها هي البداية، دايرة مقفولة في لعبة بيحكمها الفضول والطمع والانتقام..

لكن البداية مرتبطة بالاختيار، مفيش إجبار على شيء، لكنه اختيار مصيري، هيقرر بيه مصير كل حياته..

ضربة حظ، مزاد، صندوق مقفول يعرف بس في إيه لما يقرر يملكه، البطل اللي يملك الصندوق ولا العكس؟..

الصندوق اللي اتعرض عليه بكل شروطه، ومطلوب القرار من غير ما يعرف جواه ايه، ولا يعرف نهايته هتكون إيه، ولا أن في صندوق تاني في لحظة هيقلب موازين اللعبة ويغير كل حاجة!

*****

الإنسان طول الوقت مخير بين الخير والشر، وطول ما انت مش في موضع الاختبار بتكون شايف نفسك مثالي مش هتغلط، وأكيد هتكون في جانب الخير..

لكن مجرد ما بيكون الاختيار في إيدك، والمصلحة والمكاسب بتشاور من بعيد، وقتها بتظهر حقيقتك.. مش بس حقيقة اختيارك للخير أو الشر، لا حقيقة أن المبدأ لا يتجزأ، ومفيش حاجة اسمها اختار الشر بس والله هعمل بيه خير! لا مفيش..

في الإطار ده بتدور أحداث الرواية، بطل اختار الشر عشان يوصل، وبطل اختاره وهو متخيل أنه كده بيقضي على الشر، وبطل تالت اختار الشر وهو متخيل أنه كده بيرد الحقوق لأصحابها، ورابع كان فاكر نفسه بينهي دائرة الألم حتى لو هيضحي بأقرب الناس ليه.. والنتيجة دائرة مغلقة البداية فيها هي النهاية، والنهاية هي تحديداً البداية تاني ! وهكذا في دائرة أبدية تنتهي بس يوم الحساب.. والقرار قرارك تكون في أي فريق.

الحمدلله انا كان قراري بس اقرأ الكتاب مش زي قرار مازن وخالد وفيروز وديفيد.. طب هما كان مصيرهم إيه ونتيجة قراراتهم كانت إيه..

اقرأ وانت تعرف..

قراءة ممتعة

#نور

#مش-ريفيو