اقتباسات مؤمن المحمدي

العاملين في الميديا والفن، يعرفوا كويس تعبير “الريفرنس”.

‫ والريفرنس أعزك الله، هو الموديل (الأجنبي غالبا) اللي هـ يبقى في خيالنا، وإحنا بـ نشتغل على صناعة العمل. هـ يبقى في خيالنا لـ حد فين؟ دي قصة تاني. ممكن يبقى في خيالنا إلى حد نقله مسطرة، أو لـ مجرد استيحاء أفكار، أو حتى علشان نرميه ونشتغل من دماغنا، بس المهم يبقى فيه ريفرنس.

ضحية الحياة البديلة اللي عاشها كـ مواطن من الطبقة الوسطى، الفيلم ده من أعظم الأعمال اللي تناولت الطبقة دي ومأساتها، اللي بـ تتلخص في إن المواطن بـ يعيش حياة مش بتاعته، علشان يعجب ناس هو بـ النسبة لهم مش مهم.

ولـ إنه بـ يحاول يرجع لـ استقامته طول الوقت، بـ ينجح، بس مش بـ يرجع زي الأول، بـ تبقى فيه حتة من أيام المرمطة، حتة ضرورية يحافظ بيها على استقامته، وده المورال اللي بـ أفهمه من الريحاني، كـ فنان، وكـ فلسفة عامة في الحياة. الدهب لازم يتخلط بـ شوية نحاس وقصدير، لـ إن الدهب البيور أسهل في الكسر.

جريمة إبليس مش كده، لأن الخطيئة موجودة قبل التحريض، سعيد سرق الساعة قبل ما رؤوف يديله الغطاءات اللازمة لـ ده. جرايم إبليس هي إنه بـ يعمل للخطيئة سيستم، أو على الأدق بـ يعمل الخطيئة نفسها سيستم، ما بـ يخليهاش استثناء ناتج عن ضعف إنساني تجاه ظروفه، بـ يخليها هي المنطق، وهي «الشرع».