الماستر بيس السنادي
يمكن السنة اللي فاتت فنفس الوقت كنت قريت الداما لمحمد صادق وكانت افضل قراءاتي ف٢٠٢٣
السنادي يرجع الكاتب المبدع علي صيام برواية عكس كل اللي فات
يثبت بيها انه اديب مش مجرد قاص او بيقول حواديت
رواية اجيال من العيار التقيل
يمكن كنا اتكلمنا قبل كدة على موضوع رواية اجيال دي وبالتحديد على رواية معينة اخدت شهرة وجايزة كمان ورغم كدة معجبتنيش
لكن هنا طريقة السرد رغم ان حكاوي جدو علي فالرواية فيها شخصيات كتير الا انه اعتمد على اسلوب الراوي ف٣ شخصيات رئيسية الجد والحفيد التاجر والحفيد المهندس
وانا بعشق حكاوي الاجداد
خدني فرحلة للماضي وحنين للماضي لجدي وجدتي الله يرحمهم جميعاً
البراءة اللي بيحكوا بيها والالفاظ اللي بيقولوها عادي جدا والصراحة لدرجة الفضايح الكوميدية
فعلا كنت مفتقد قاعدة زي دي مع اجدادي الحقيقة
وهنا علي تقمص دور الجد وكأنه اتلبس بأرواح الاجداد السابقين واتكلم بلسانهم وطرقهم وعادتهم العجيبة المريبة
اللغة كانت قوية وجميلة والحوار والسرد مابين الفصحى والعامية كان موفق جدا فيه
لون الرواية مختلف تماما عن كل اللي كتبه علي قبل كدة
عمل خليط سحري هنا مابين فانتازيا واقعية على تاريخ اسكندرية وحواريها على مواجهة الواقع المحبط وقلة تجمعات العيلة بسبب المشاغل والسعي للرزق على جزء رومانسي بسيط جدا رغم انها رومانسية من زمن منسي لكن كانت جميلة غير انه حافظ على خط التشويق للنهاية
حاجة اخيرة هو واضح تأثر علي صيام بفكر خيري شلبي وبالمناسبة انا من القليلين اللي مش بحب كتابات خيري شلبي لكن هنا علي متفوق جدا عليه الصراحة
عمل السهل الممتنع الممتع
ارجوك ياعم علي قدم في مسابقة كتارا
انت تستحق جايزة فعلا على مجهودك وابداعك ده
ودة والله ما مجاملة
وللعلم
أنا جبت الرواية نسخة ورقية مش إلكترونية
في جزء قليل جدا من الكُتّاب بالنسبالي لازم الكتاب يكون نسخة ورقية وتستمتع بريحة الورق وملمس الصفحات