إن أعظم ما يخافه .. هو أعظم ما أريده.

من كتاب مذكرات عبد أمريكى📚 لفريدريك دوجلاس اللى بيمثل سيرة ذاتية عن حياته كعبد فى مزارع ولايات الجنوب الأمريكى.

بيتكلم فى البداية عن "جهله" بيوم ميلاده وإن مفيش حد من العبيد كان عارف عمره اصلا. عن والدته اللى تم عزلها عنه وهو عمره سنتين ومشفهاش غير خمس مرات لحد ما بقى عنده سبع سنين لما ماتت وإن اكتر شىء أحزنه انه اتعامل مع موتها كأن غريب مات. عن اخواته الاتنين البنات اللى كانوا عايشين معاه فى نفس المزرعة ومكانش بينهم اى مشاعر اخوة لان عزل الام عزل اى احساس أسرى. عن بنت خاله وعندها 16سنة نامت جنب رضيع سيدتها وهو بيعيط فقامت سيدتها ضربتها بهراوة وكسرت انفها وضلوعها وماتت بعد 6ساعات ببطىء ودفنوها ولا كأن حاجة حصلت. اتكلم عن حاجات كتير وبرغم كدا كاتب إن حاله كان بالنسبة للعبيد كويس.

بيتنقل لبيت جديد فى مدينة بالتيمور. بيكون اول عبد لسيدة قريبة لسيده القديم.بتعامله كويس وبتبدأ تعلمه القراءة. لكن مش بتلحق لأن سيده القديم فى زيارة ليها شافها بتعلمه..

وهنا نقطة التحول :)

لما سمعه بيقول وده نقل لكلام سيده بالظبط "إذا أعطيت زنجيا بوصة. سيأخذ ذراعا.. لا يجب أن يتعلم الزنجى شيئا غير طاعة سيده.. التعليم يفسد أفضل زنجى فى العالم, والآن إذا علمتى هذا الزنجى _يقصد دوجلاس_ القراءة فلن يبقى هنا,,سوف يصبح من غير المناسب له أن ىيبقى عبدا..سوف يصبح متمردا وبلا نفع لسيده "

دوجلاس بيقول إن اللى ساعده فى رؤية الحقيقة والحل لعبوديته كان سيده القاسى أكتر من سيدته الطيبة. وأنه لأول مرة يدرك طريق لحريته.. وفى الوقت اللى كان حزين بفقدان مساعدة سيدته فى التعليم ..كان سعيد بالمعلومة التى لا تقدر.
الطريق للحرية يبدأ بالتعلم ..

إن أعظم ما يخافه هو أعظم ما أريده
وما بالنسبة له شر عظيم يجب تجنبه
كان بالنسبة لى خيرا عظيما يجب إدراكه.
ده كلام دوجلاس بالظبط عن الموقف.

دوجلاس بيتعلم من وراهم بعد كدا بطرق تانية صعبة بس إتعلم .. دوجلاس كان بيكتب مذكراته وهو انسان حر :D وكمان من أشهر الناس اللى حاربت العبودية وأثر فى ملايين أيدوا إلغاء العبودية بخطب ومقالات وكتب.

المقصود .. إن العبودية أأشكالها كتير ..يمكن عبودية للمال او التقاليد او المجتمع أو الأنظمة ..لكن طريق الحرية دايما أوله التعليم :) وأول حاجة ممكن تتعلمها إنك إنسان حر وسيد قرارك..
إتعلم بره الصندوق وإقرأ الكتاب الممنوع لأن السلطة اللى تمنعك تقرأ وتتعلم إعرف إن الكتاب ده بيفضحها بطريقة ما.
إتعلموا وإقرأوا ممكن نكون فى يوم أحرار ذى دوجلاس :)

#benarfareads
#benarfareading 📚